Pezullohen lundrimet në linjat Durrës-Bari, shkak moti i keq

Për shkak të përkeqësimit të kushteve të motit në orët në vazhdim, Autoriteti Portual i Durrësit ka njoftuar se do të pezullohen lundrimet e trageteve nga Durrësi drejt Barit (Itali) dhe anasjelltas.

Parashikimet meteorologjike tregojnë erë të fortë nga verilindja dhe det të trazuar me forcë deri në 8-9 ballë.

Kapiteneria njofton se janë pezulluar lundrimet e dy trageteve nga Durrësi dhe dy trageteve nga Bari. Ndërkohë, lundrimet në linjën Ankona-Durrës dhe anasjelltas do të vazhdojnë normalisht.

“Nisjet dhe mbërritjet për linjat Durrës-Bari dhe Bari-Durrës, datë 12.01.2024, janë anuluar për shkak të erës së fortë me drejtim Veri-Lindje dhe forcë 8 në Adriatikun Jugor. Lundrimet për linjën Ankona-Durrës për të njëjtën datë do të funksionojnë si zakonisht”, njofton Kapiteneria.