Çështja “Beleri”, ambasadorja greke shkon në SPAK, pas saj mbërrin dhe Dule

Ambasadorja greke Konstantina Kamits ka mbërritur mëngjesin e sotëm në Prokurorinë e Posaçme (SPAK), për të kërkuar informacione mbi çështjen e Fredi Belerit.

Pas saj në SPAK është paraqitur edhe kreu i Partisë Bashkimi për të Drejtat e Njeriut Vangjel Dule.

Kryebashkaiku i zgjedhur i Himarës mbahet në burg prej 10 Majit të këtij viti, pasi u kap duke blerë vota. Pavarësisht se ka kërkuar disa herë masë të më lehtë sigurie, GJKKO nuk e ka pranuar.

Kujtojmë se shteti grek po lobon fort për të nxjerrë nga burgu Belerin, duke çuar edhe një amendament në Parlamentin Europian për lirimin e tij.

Kjo nuk është hera e parë që ambasadorja greke bën lëvizje të tilla, pasi më herët e ka vizituar Belerin si në paraburgimin e Vlorës, ashtu edhe në burg, pas vendimit të GJKKO-së ndaj tij.

Ndërkaq vizita e saj në SPAK vjen vetëm një ditë pas deklaratave të kryeministrit të Greqisë Kyriakos Mitsotakis, i cili gjatë një konference për shtyp, në Panairin e 87-të Ndërkombëtar të Selanikut tha se nuk do të ndalonte së ngrituri këtë çështje dhe veçanërisht për faktin se autoritetet shqiptare nuk po e lejonin Belerin të ushtronte të drejtën e tij për t’u betuar si kryetar i zgjedhur i Himarës, për të cilën ai tha se ishte një shkelje e shtetit ligjor.