Sulmi terrorist me tre të vdekur në Nicë, SHBA-ja dhe BE-ja me tone të ashpra

Bota
Sulmi terrorist me tre të vdekur në Nicë, SHBA-ja dhe BE-ja me

Udhëheqësit e Bashkimit Evropian dënuan të enjten sulmet e fundit në Francë dhe i kërkuan botës "të punojë drejt dialogut dhe mirëkuptimit midis komuniteteve dhe feve, në vend të ndarjes".

Në një deklaratë të lëshuar nga shefi i Këshillit Evropian, Charles Michel, 27 udhëheqësit, shprehën solidaritet me Francën, por nuk iu referuan polemikave rreth karikaturave të profetit Muhamed.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

Çfarë ndodhi në Nicë?

Tre persona kanë vdekur në një sulm me thikë në qytetin francez, Nicë, ka thënë policia.

I dyshuari është ndaluar pak pas sulmit. Kryetari i Nicës, Christian Estrosi ka thënë se gjithçka çon drejt “sulmit terrorist në zemër të bazilikës Notre-Dame”.

Estrosi ka thënë edhe se i dyshuari i sulmit, ka bërtitur "Allahu Akbar" (Zoti është më i madhi) edhe pasi është arrestuar nga policia, transmeton agjencia e lajmeve, Reuters.

Burimet e policisë e emëruan të dyshuarin si Brahim Aioussaoi, një tunizian 21-vjeçar i cili arriti me anije në ishullin italian të Lampedusas në shtator.

Ai u vendos në karantinë për koronavirus atje para se të lirohej dhe iu tha të largohej nga Italia. Ai arriti në Francë më parë këtë muaj.

Presidenti francez, Emmanuel Macron, tha se Franca ishte e ekspozuar ndaj një sulmi terrorist islamik.

Ky sulm vjen derisa Franca ende po rimëkëmbet nga shoku që ka përjetuar për shkak të një sulmi tjetër, që ka ndodhur më herët gjatë këtij muaji atje.

Mësuesit, Samuel Paty, i është prerë koka në Paris nga një sulmues me origjinë çeçene.

Sulmuesi i Payt ka thënë se ka dëshiruar që ta ndëshkojë mësuesin pse u ka treguar nxënësve karikaturat e Profetit Muhamed në një orë mësimore.

Karikaturat të publikuara vite më parë nga revista satirike franceze, Charlie Hebdo, zyrat editoriale të së cilës janë sulmuar më 2015 nga sulmues që kanë lënë të vdekur 12 persona shihen si blasfemi nga disa myslimanë.

Prej prerjes së kokës së Patyt, karikaturat janë shfaqur në disa pjesë të Francës, në shenjë solidariteti, derisa Macron, i cili është takuar me komunitetin mysliman në Francë, është zotuar se do ta luftojë “separatizmin islamist”.

Trump: Të ndalen sulmet terroriste

Pas sulmit në Nicë, reagime ka pasur edhe nga liderët tjerë botërorë.

Presidenti i SHBA-së, Donald Trump të enjten shprehu solidaritet me Francën, duke kërkuar ndaljen e sulmeve terroriste.

"Zemrat tona janë me njerëzit e Francës. Amerika qëndron me Aleatin tonë më të vjetër në këtë luftë", shkroi Trump në Twitter.

"Këto sulme radikale islamike terroriste duhet të ndalen menjëherë. Asnjë vend nuk mund ta durojë gjatë!", ka shkruar Trump.

Sulmin e kanë dënuar edhe Kombet e Bashkuara, liderët e Izraelit dhe ata të vendeve arabe.

ME TE LEXUARAT