U shërua nga Covidi por mbetet në spital, ish-deputeti Toçi zbulon se çfarë ”goditje” i ka dhënë koronavirusi

Aktualitet
U shërua nga Covidi por mbetet në spital, ish-deputeti Toçi

Ish-deputeti socialist Fatmir Toçi përmes një postimi në rrjetet sociale ka zbuluar se është shëruar nga Covid 19, ndërkohë që vijon të ketë probleme me mushkëritë.

Toçi shprehet se edhe për ca kohë do të jetë i detyruar të mbetet nën kujdesin e mjekëve në spitalin “Shefqet Ndroqi”, pasi virusi i ka prekur mushkërinë dhe i ka dhënë disa shqetësime serioze.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

“Pas 25 ditësh nga testimi i tamponit të parë, dje u krye testimi i tamponit të dytë, i cili rezultoi NEGATIV. Ky është një lajm i gëzueshëm, entuziast e shpresëdhënës, tashmë nuk ka më virus Covid-19 në trupin tim, edhe pse kjo e keqe nuk kaloi pa dhënë një goditje në mushkëri, të cilën e ka prekur pjesërisht, duke më detyruar të mbetem edhe për ca kohë nën kujdesin e jashtëzakonshëm të mjekëve dhe specialistëve të Spitalit Universitar “Shefqet Ndroqi” në Sauk të Tiranës, ku organizon e drejton me dorë të hekurt prof. Perlat Kapisyzi me stafin e tij të mrekullueshëm.

Dua të mendoj, dhe besoj, që edhe në qendrat e tjera spitalore, të cilat janë angazhuar në luftën anticovid është i njëjti impenjim dhe të njëjtat rezultate. Nuk gjenden fjalët për të shprehur mirënjohjen dhe falënderimet për këta heronj të kohës sonë, që i janë përkushtuar me profesionalizëm dhe humanizëm jetës së të tjerëve, duke harruar shpesh edhe veten e tyre.

Me ato që kam parë e shoh çdo ditë këtu, fjalët janë të varfra dhe nuk mund të shprehin as të njëmijtën e angazhimit njerëzor dhe të shpirtit të tyre fisnik, për t’ju shërbyer dhe për t’i shpëtuar jetët njerëzore. Me përulësi përpara tyre, që mu gjenden në ditët më të vështira të jetës sime dhe po më rikthejnë në jetë!”, shkruan Toçi në postimin e tij në rrjetet sociale.

ME TE LEXUARAT