Ndryshimet kushtetuese sot në Kuvend, Opozita e Bashkuar: Hiqni dorë dhe vijoni dialogun!

Politikë
Ndryshimet kushtetuese sot në Kuvend, Opozita e Bashkuar: Hiqni dorë

Opozita e Bashkuar i ka bërë apel Partisë Socialiste që të heqë dorë nga ndryshimet e njëanshme kushtetuese dhe e fton të vijojnë dialogun në Këshillin Politik.

Në një deklaratë, Opozita e Bashkuar thekson se ndryshimet e njëanshme kushtetuese nuk janë te detyrueshme për të prandaj PS duhet t’i qëndrojë konsensusit dhe marrëveshjes së përbashkët të 5 qershorit.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

Duket se me këtë deklaratë Opozita e Bashkuar paralajmëron se nuk do t’i njohë ndryshimet kushtetuese që sjellin lista të hapura e ndalim të koalicioneve. Më tej theksohet se me këto ndryshime të njëanshme zhbëhet marrëveshja e 5 qershorit si dhe konsensusi.

Opozita e Bashkuar shton se me këto veprime PS provon qartë dëshpërimin nga humbja e pushtetit të liderishipit të saj. Ditën e djeshme Damian Gjiknuri refuzoi në tryezën e Këshillit Politik propozimin e PD- LSI për hapje të listave dhe mos prekje të nenit 64 që ndalon koalicionet. Duket se PS është e vendosur t’i miratojë sot ndryshimet kushtetuese me opozitën parlamentare.

DEKLARATË E OPOZITËS SË BASHKUAR

30 korrik 2020

Opozita e Bashkuar dënon braktisjen e dialogut në Këshillin Politik nga Partia Socialiste gjatë mbledhjes së djeshme. Pavarësisht vullnetit tonë për të vijuar rrugën e dialogut dhe shqyrtimit në mirëbesim të propozimit tonë për konsensus, duke i qëndruar Marrëveshjeve të 5 Qershorit dhe 14 Janarit, Partia Socialiste zgjodhi rrugën e braktisjes së dialogut dhe të ecjes drejt akteve të njëanshme që dhunojnë këto marrëveshje politike të nënshkruara mes palëve.

Opozita edhe në mbledhjen e djeshme tregoi përgjegjshmëri dhe seriozitet duke paraqitur propozimin konkret të kompromisit, për hapjen 100 % të listave të kandidatëve. Në 5 orë mbledhje, Partia Socialiste nuk dha asnjë arsye për refuzimin e propozimit tonë, duke dëshmuar edhe njëherë mungesë vullneti për dialog.

Ndryshimet e njëanshme kushtetuese shkatërrojnë konsensusin, thyejnë dhe zhbëjnë marrëveshjet e 5 Qershorit dhe të 14 Janarit të nënshkruara nga vetë Partia Socialiste, dhe sjellin pasoja të rënda për stabilitetin, demokracinë dhe integrimin europian të vendit.

Njëanshmëria nuk është rruga demokratike për përcaktimin e rregullave të zgjedhjeve në një vend anëtar të OSBE-së. Njëanshmëria është rruga e autokratëve që i kanë braktisur qytetarët dhe kanë frikë nga vullneti qytetar. Njëanshmëria nuk është në interes të Shqipërisë dhe të shqiptarëve dhe as në përputhje me aspiratën e qytetarëve për Shqipërinë në Europë.

Opozita e Bashkuar është e vendosur ti qëndrojë me besnikëri interesit të Shqipërisë dhe shqiptarëve. Dialogu politik është rruga e vetme për gjetjen e konsensusit. Asnjë akt i njëanshëm nuk është i detyrueshëm për Opozitën dhe aq më pak për qytetarët.

Opozita e Bashkuar ripërsërit apelin për Partinë Socialiste, që të gjejë forcë dhe ti qëndrojë Marrëveshjeve që ka nënshkruar, duke hequr dorë nga aktet e njëanshme për ndryshimin e Kushtetutës dhe duke vijuar dialogun.

Prishja e konsensusit, thyerja dhe zhbërja e marrëveshjeve që vetë ka nënshkruar, dhe tentativa për të prishur normalitetin e zgjedhjeve të ardhshme, janë provë e qartë e dëshpërimit nga humbja e pushtetit që ka kapur prej kohësh lidershipin e Partisë Socialiste.

ME TE LEXUARAT