Lajmi Fundit
LajmiFundit, Portal me Lajme nga Shqiperia

Vdekja e 25-vjeçares pas lindjes/ Prokuroria kërkon arrestim, mjeku ka ikur në SHBA

Një nga ngjarjet më të dhimbshme të ndodhura në vendin tonë ka qenë edhe ajo e vdeksjes së 25-vjeçares Rexhina Debrova, pasi kishte sjellë në jetë vogëlushen e saj.

Senaca gjyqësore vazhdon ende, nga ku Prokuroria e Elbasanit ka kërkuar arrestimin e mjekut gjinekolog, Ardian Kadaifçiu për neglizhencë.

Mirëpo mesa duket kjo nuk do të realizohet për shkak se mjeku nuk ndodhet në Shqipëri, por prej disa kohësh është larguar drejt Shteteve të Bashkuara të Amerikës së bashku me familjen e tij.

Sipas Panorama, Ardian Kadaifçiu ishte mjeku gjinekolog, i cili asistoi në lindjen e Rexhina Debrovës, në muajin prill të këtij viti. Prokurori i çështjes i ka kërkuar Gjykatës së Elbasanit caktimin e masës së “Arrestit në burg” në mungesë, pasi gjatë veprimeve hetimore ka rezultuar që mjeku ka bërë neglizhencë gjatë trajtimit mjekësor ndaj 25-vjeçares. Sakaq, mësohet se mjeku u largua në Shtetet e Bashkuara të Amerikës pak kohë pas ngjarjes së rëndë. Për këtë, Policia e Elbasanit e ka shpallur në kërkim mjekun Kadaifçiu.

Ngjarja e ndodhur në muajin prill të këtij viti tronditi qytetarët e Elbasanit, por jo vetëm. Dhimbja e familjarëve të Rexhina Debrovës u përçua në gjithë vendin, ndërsa hodhën akuza të rënda ndaj mjekëve që ndoqën rastin e Rexhinës, ditën kur kishte mbërritur me urgjencë në spital. Nëna 25-vjeçare, pak momente pas lindjes ishte ankuar se diçka nuk po shkonte me shëndetin e saj. Kjo ankesë, nga hetimet e organit të akuzës duket se është neglizhuar nga stafi në sallën e lindjes, duke e cilësuar si normale, por pak minuta më pas ajo ndërroi jetë.

Familjarët e Rexhinës hodhën akuza të rënda ndaj mjekëve të spitalit, duke i bërë ata përgjegjësit kryesorë për neglizhencën e treguar ndaj nënës së re, që sipas tyre shkaktuan vdekjen e Rexhinës. Vetëm pak ditë pas ngjarjes, mjeku ligjor nxori autopsinë, ku u konfirmua se shkaku i vdekjes së saj ishte koagulimi, mpiksja e gjakut ose e thënë ndryshe, bllokimi i njërës nga venat që çojnë gjakun në mushkëri. Mjekët e shpjeguan këtë rast si normal, pasi ndodhin raste të tilla pas lindjes.

Familjarët e së resë nuk e pranuan këtë fakt, duke bërë më pas denoncimin e rastit në Prokurori. Ata kërkuan zbardhjen e ngjarjes dhe arrestimin e mjekut që ndiqte rastin e Rexhinës. Bashkëshorti i së ndjerës mësohet se herë pas here interesohej për hetimet që kryente organi i Akuzës, duke çuar më tej thellimin e hetimeve në dosje.
KERKESA

Të afërmit e vajzës kanë deklaruar që nga momenti i ngjarjes se shteti duhet të funksionojë deri në fund dhe autorët që çuan në vdekjen e Rexhinës, e cila la pas një vajzë të porsalindur, duhet të shkojnë në qeli. Tashmë Policia e ka shpallur në kërkim mjekun gjinekolog, ndërsa ende nuk dihet nëse ky i fundit do t’i vetëdorëzohet drejtësisë shqiptare apo do të arrestohet në SHBA, aty edhe ku ndodhet aktualisht

Pergjigju

Adresa juaj e-mail nuk publikohet