“Çunat problematikë”, Gjiknuri reagon për përgjimet: Janë spekulime...

Aktualitet

Deputeti i Partisë Socialiste, Damian Gjiknuri reagoi lidhur me përgjimet e reja te publikuara nga gazeta gjermane, Bild, ku eshte regjistruar teksa fliste për “çunat problematikë” që kishte çuar pranë shtabit elektoral në Dibër.

Sipas Gjiknurit, në bisedat telefonike të dosjes 184 nuk ka asnjë veprim që bie ndesh me ligjin apo shkon përtej komunikimit normal organizativ mes shtabit elektoral në një fushatë.

“Referuar publikimeve të fundit në media rreth procesit zgjedhor në Bashkinë e Peshkopisë në vitin 2016, me synim transparencën dhe hedhjen poshtë të spekulimeve të qëllimshme sqaroj se për periudhën për të cilën bëhet fjalë kam mbajtur funksionin e drejtuesit politik të PS në Qarkun Dibër. Në bisedat e mia telefonike të publikuara audio në gjuhën shqipe, nuk ka asnjë veprim që bie ndesh me ligjin apo shkon përtej komunikimit normal organizativ mes shtabit elektoral në një fushatë”, theksoi Gjiknuri.

Ish-ministri thekson se çdo pretendim tjetër përveç konsiderimit të bisedës si “komunikim organizativ mes shtabit” është spekulim i qëllimshëm për të njollosur fitoren e PS.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

“Çdo pretendim tjetër është deduksion politik i qëllimshëm, madje edhe transkriptim dhe koment i pavërtetë në raport me atë çka thuhet me zë prej meje apo asaj çka përfaqësojnë bashkëbiseduesit.

Natyrisht, ky spekulim bëhet qëllimshëm për të njollosur fitoren e merituar të kandidatit të Partisë Socialiste dhe punën organizative të të gjithë kordinatorëve elektoral ashtu dhe timen si drejtues politik. Duke qenë se çështja është në hetim nga prokuroria nuk është normale që unë të flas me detaje për këtë proces”, thotë ai.

Gjiknuri shton se mbështet dhe inkurajon prokurorinë të hetojë çdo indicie ndaj kujtdo përfaqësuesi të PS të angazhuar në procesin zgjedhor.

“Mbështes dhe inkurajoj prokurorinë të hetojë çdo element, pretendim apo qoftë dhe indicie për veprimtarinë e kujtdo përfaqësuesi të Partisë Socialiste të angazhuar në këtë proces zgjedhor.

Publiku duhet të dijë se si ka mundësi që Prokuroria e Krimeve të Rënda në atë kohë, ka përfshirë në përgjim të gjithë shtabin elektoral të PS me vetëm një kallëzim nga subjekti kundërshtar Partia Demokratike, madje e ka regjistruar hetimin për korrupsion dhe jo për shitblerje votash!?”,- pyet në fund Gjiknuri.

ME TE LEXUARAT