Lajmi Fundit
LajmiFundit, Portal me Lajme nga Shqiperia

“Drejtësia”, Rama kushtëzon Bashën: Nuk e pranojmë propozimin, ja sa kohë ke!

basha-ramaKryeministri Edi Rama i ka kthyer përgjigje kryetarit të Partisë Demokratike Lulzim Basha, pas replikave të djeshme në rrjetet sociale për të arritur konsensus për reformën në drejtësi.

Sërish përmes Facebook-ut, Kryeministri thotë se propozimin aktual të opozitës nuk mund ta pranojnë, megjithëse janë të hapur për të mirëpritur çdo propozim tjetër. Në të tilla kushte, thotë Rama, negociatorët e mazhorancës nuk kanë se çfarë të bisedojnë me opozitën.

Kryeministri i ka lënë afat Bashës për të paraqitur propozimet deri në orën 10:00 të 21 korrikut, dita kur drafti i reformës në drejtësi do të kalojë në Parlament për t’u votuar. Basha u shpreh dje se propozimi i PD-së është i mbështetur tërësisht në rekomandimet e Komisionit të Venecias dhe i kërkoi kreut të Qeverisë që pa humbur kohë të dërgonte negociatorët për të gjetur gjuhën e përbashkët mes mazhorancës dhe opozitës.

Përgjigjia në Facebook e Kryeministrit Edi Rama:

“Zoti Rama, Lëri letrat e hapura dhe shfaqjet publike. Reforma në drejtësi kërkon seriozitet dhe impenjim, jo tallje e as manovra politike. Propozimi ynë bazohet 100% tek rekomandimet e Venecias, të cilat PD dhe PS i kanë pranuar si udhërrëfyesin e vetëm. Autorizo negociatoret e PS ti rikthehen negociatave për zgjidhje. Negociatorët e PD janë, sic e dini, të gatshem që sot.”

Zoti kryetar i PD,

e lexova me keqardhje dje këtë reagim destruktiv Tuajin ndaj letrës sime publike dhe lejomëni t’Ju rikujtoj publikisht, që propozimi Juaj “i bazuar 100% tek rekomandimet e Venecias” jo vetëm nuk njihet si i tillë nga SHBA/BE, po është refuzuar kategorikisht dhe publikisht prej tyre.

Si mund ta pranojë qeveria e këtij vendi një “zgjidhje” të papranueshme për SHBA/BE, e cila hedh në erë themelet e Reformës në Drejtësi dhe hap një hendek të pakapërcyeshëm në rrugën e Shqipërisë drejt çeljes së negociatave për anëtarësim në Bashkimin Europian?!

Si dhe çfarë mund të negociojnë negociatorët sipas Jush, për sa kohë PD nuk lëviz nga ky propozim, që ka si kusht përjashtimin de facto të Operacionit Ndërkombëtar të Monitorimit në procesin e pastrimit të sistemit nga gjykatësit e prokurorët e korruptuar?!

Si ka mundësi që pasi ka shterruar gjithë uji i Venecias, Ju të bëni shurdhin kryeneç ndërkohë që kambanat e alarmit për Shqipërinë bien nga të katër anët, e të përsërisni nga bunkeri ku jeni kyçur bashkë me Partinë Demokratike, të njëjtën kërkesë të papranueshme për të gjithë?!

I dashur Lulëzim,

thirrini mendjes, çlirohuni nga frika prej Reformës në Drejtësi dhe mos viktimizoni, për llogari të një grushti të korruptuarish, një popull të tërë që ka sot të drejtën e tij sovrane për të marrë mbrapsht, hakun e ngrënë 25 vjet me radhë nga të inkriminuarit që mbajnë peng drejtësinë në Shqipëri!

Ju kam propozuar të na paraqisni çdo ndryshim të dëshiruar që mund të gjejë dakordësinë e SHBA/BE dhe do ta pranojmë e do ta votojmë pa lëvizur asnjë presje. Ky propozim është shumë serioz dhe mbetet në fuqi deri në oren 10.00 të datës 21 korrik, kur ne do të hyjmë në sallën e Kuvendit për të votuar reformën.

Unë jam gati të takohem me Ju që nesër për të diskutuar ballë për ballë në kërkim të zgjidhjes së këtij ngërçi absurd. Madje jam gati, që nesër, të debatojmë edhe përpara shqiptarëve, në çdo format televiziv të pranueshëm për Ju, mbi pikën që ndan jo thjesht qëndrimet tona, po qëndrimet Tuaja, të Partisë Demokratike, me qëndrimin e unifikuar të shumicës sonë qeverisëse, të Shteteve të Bashkuara e të Bashkimit Europian.

Koha vrapon sfida është historike!

Edi Rama

Anetaresohuni ne Forumin e LajmiFundit.al dhe diskutoni e postoni lirisht per te gjitha temat qe deshironi!

Pergjigju

Adresa juaj e-mail nuk publikohet