Samiti i liderëve europianë në Sofje/ Macron kritik për Shqipërinë, ja çfarë i tha Ramës

Politikë

Samiti i liderëve europianë në Sofje e kthen për një ditë gjithë vëmendjen e institucioneve europiane dhe shteteve anëtare të Bashkimit Europian te Ballkani Perëndimor.

Gjashtë liderët e Ballkanit duke mbërritur në samitin e Sofjes nuk e kanë fshehur kënaqësinë që ky samit i kushtohet krejtësisht perspektivës europiane të vendeve të Ballkanit, projekteve konkrete në rajon dhe një bashkëpunimi më të fortë me Bashkimin Europian në disa fusha.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

Të gjashtë kanë buzëqeshur teksa hynin në samitin e Sofjes. Por shtetet anëtare të Bashkimit Europian nuk shprehin të gjitha të njëjtin entuziazëm për anëtarësimin e ardhshëm të vendeve të Ballkanit në Bashkimin Europian.

Edhe pse kanë ecur krah për krahu në samitin e Sofjes, tre liderët e shteteve kyçe të BE-së, Gjermanisë, Francës dhe Britanisë së Madhe e kanë shprehur qartë këtë ndasi.

Gazeta e njohur gjermane, Tagesspiegel shkruan se Macron është veçanërisht kritik me Shqipërinë.

“Mbi të gjitha, presidenti francez Emmanuel Macron ka rezerva për hapjen e shpejtë të negociatave me Shqipërinë. Arsyeja: vitin e shkuar, ndryshe nga Gjermania, Franca ka shënuar një rritje të numrit të azilkërkuesve shqiptarë, krahasuar me një vit më parë.

Në fillim të kësaj jave, Macron hodhi poshtë shqetësimet e kryeministrit shqiptar Edi Rama, në një takim që zgjati një orë e gjysmë në Pallatin Elize, Paris”, shkruan gazeta.

Sidomos i ashpër u tregua presidenti francez, Emmanuel Macron: “Unë jam shprehur mbi këtë pikë. Jam në favor që Ballkani t’i bashkangjitet Europës, por çdo zgjerim i Bashkimit Europian duhet të shihet me shumë kujdes dhe rreptësi. Ka diskutime në vijim dhe duhet të vazhdojmë t’i zhvillojmë.

Duhet të ndihmojmë të gjithë vendet që po kryejnë reformat dhe që avancojnë drejt Bashkimit Europian dhe kjo është një zgjedhje gjeostrategjike e imja. Por, nuk jam në favor të zgjerimit para se të kemi të gjitha bindjet e duhura dhe para se të bëjmë një reformë të vërtetë që mundëson thellimin dhe funskionimin më të mirë të Bashkimit Europian.

15 vitet e fundit kanë treguar një rrugë që e ka dobësuar Europën, duke menduar çdo herë për zgjerimin e saj. Dhe mendoj, se kjo nuk i shërben as vendeve kandidate as neve vetë duke pasur një mekanizëm që nuk ka më rregulla dhe që shkon gjithnjë drejt zgjerimit. Por jam në favor që Ballkanit të ketë një dialog strategjik të përforcuar, një perspektivë dhe që ne të ndjekim nga afër reformat që bëhen dhe t’i inkurajojmë ato pa hiprokrizi”.

ME TE LEXUARAT