Ambasadori amerikan: Një ish-ministër i Brendshëm i Shqipërisë i implikuar në Itali

Aktualitet

Ambasadori amerikan në OSBE vëren se kriminaliteti dhe korrupsioni mbeten pengesë për prosperitetin në Shqipëri. Ai përmend rastin e ish-ministrit Tahiri apo dhe disa rekomandime të përmendura në raportin e OSBE-ODIHR për zgjedhjet.

Kreu i Misionit të Shteteve të Bashkuara në Këshillin e Përhershëm të OSBE-së në Vjenë, Harry Kamian ka publikuar një përgjigje lidhur me raportin e detajuar të përpiluar nga Kryetari i Prezencës së OSBE-së në Shqipëri, ambasadori Bernd Borchardt.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

“Korrupsioni dhe kriminaliteti në të vërtetë mbeten pengesa për prosperitetin në Shqipëri. Prokuroria e Tiranës po heton aktualisht më shumë se 3000 raste të marrjes ne pune dhe shkarkimeve gjatë periudhës së fushatës zgjedhore 2017, një shqetësim që është ngritur edhe nga ODIHR.”

Kreu i Misionit të Shteteve të Bashkuara në Këshillin e Përhershëm të OSBE-së në Vjenë flet edhe për zgjedhjet parlamentare të qershorit në Shqipëri. Duke cituar raportin fillestar të ODIHR, Ambasadori Kamian, shkruan se kandidatët zhvilluan fushatë të lirë si dhe nënvizon se u respektuan liritë themelore. Por ai ka edhe disa kritika.

“Këto rezultate vërtet shënojnë përparim të rëndësishëm. Megjithatë, ODIHR raportoi gjithashtu se Shqipëria nuk arriti të adresojë shumë nga rekomandimet e ODIHR dhe Komisionit të Venecias të Këshillit të Evropës nga viti 2013 dhe 2015, duke përfshirë nevojën për depolitizimin e aspekteve kyçe të administratës zgjedhore. Përveç kësaj, ODIHR raportoi se besimi i publikut në procesin zgjedhor mbetet i ulët”.

Në komentin e tij, Kamian shfaq shqetësimin e tij për rastin Tahiri.

“Një ish-ministër i brendshëm – i cili tani është anëtar i Parlamentit – është implikuar në Itali për mbështetjen e trafikantëve të drogës”.

Ndër të tjera, zyrtari amerikan përgëzon Prezencën e OSBE-së në Shqipëri për ndihmën që i ka dhënë vendit tonë në luftën kundër korrupsionit dhe krimit të organizuar si dhe për reformën e gjyqësorit./abcnews

ME TE LEXUARAT