Leskaj i shkruan letër presidentit të KiE: Ndalimi i Haradinaj i paligjshëm e absurd

Nënkryetarja e Kuvendit, Valentina Leskaj i ka nisur gjatë ditës së sotme një letër presidentit të Asamblesë Parlamentare të KiE-së Pedro Agramunt, lidhur me ndalimin e kreut të AAK-së Ramush Haradinaj. Leskaj shprehet se një vendim i tillë është i papranueshëm, duke shtuar se rasti në fjalë përbën shkelje flagrante të të drejtave themelore të njeriut.

Sipas Leskajt, kreu i AAK-së, bazuar në vendimet e dy dhomave të Tribunalit të Hagës për ish-Jugosllavinë, është liruar nga çdo akuzë që i drejtohej përpara vitit 2004. Ajo shton se për rrjedhojë, ndalimi në fjalë është absurd. Në letrën dërguar presidentit të Asamblesë Parlamentare të KiE-së, Leskaj nënvizon se ky veprim mund të minojë edhe dialogun mes Kosovës dhe Serbisë.

Letra e Nënkryetares së Kuvendit, znj. Valentina Leskaj për Presidentin e Asamblesë Parlamentare të KiE-s, z. Pedro Agramunt

I dashur President,

Kam kënaqësinë e veçantë që t’ju dërgoj sërish urimet e mia më të mira për Vitin e Ri 2017! Nisur nga ngjarja e fundit e ndalimit në France të Kryetarit të partisë së AAK-së (Aleancës për Ardhmërinë e Kosovës) z. Ramush Haradinaj më lejoni të parashtroj qëndrimin tim si Kryetare e Delegacionit të përhershëm parlamentar pranë KiE-s.

Ndalimi i z. Ramush Haradinaj në një vend të KiE-s, bazuar në një urdhër të vjetër arresti të Serbisë, është i papritur e njëkohësisht i papranueshëm. Ai përbën një shkelje flagrante të të drejtave themelore të njeriut. Kryetari i AAK-së, bazuar në vendimet e të dy Dhomave të Tribunalit të Hagës për ish-Jugosllavinë, është liruar nga çdo akuzë e përpara vitit 2004, për rrjedhojë ky ndalim është i paligjshëm dhe absurd. Prishtina dhe Beogradi janë angazhuar në një proces të vështirë dialogu, nën vëzhgimin e BE-së dhe një veprim i tillë nga një vend anëtar i BE-së dhe KiE-s dëmton këtë proces shumë të rëndësishëm për të dy vendet dhe për rajonin.

Ky veprim jo vetëm që nuk ndihmon normalizimin e marrëdhënieve mes dy vendeve por krijon precedentin e rrezikshëm të mosrespektimit të drejtësisë dhe shkeljes së të drejtat themelore të njeriut (vendimet e Tribunalit të Hagës për ish-Jugosllavinë). Një ngjarje e tillë nuk mund ta lërë indiferent KiE-n, e cila është angazhuar seriozisht në promovimin dhe respektimin e të drejtave të njeriut jo vetëm në Kosovë por në të gjithë rajonin e Ballkanit. Personalisht mirëpres një reagim dhe qëndrim të KiE-s si dhe kontributin e saj për lirimin e menjëhershëm të z. Haradinaj dhe sensibilizimin e të gjitha vendeve anëtare për mos përsëritjen e precedentëve të tillë në të ardhmen.

Sinqerisht Valentina Leskaj

Pedro Agramunt, President of the Parliamentary Assembly of the Council of Europe, Strasburg.

Kliko per me shume info Kliko per me shume info

Leave a Reply

Your email address will not be published. Required fields are marked *

*

x

Check Also

Shkarkimi i Elvis Roshit, Nishani dekretoin datën e zgjedhjeve të reja në Kavajë

Presidenti Nishani dekreton caktimin e datës së zgjedhjeve për kryetar bashkie, bashkia ...