Histori e pazakontë, ja kamarierja fierake që vodhi 7 lokale në Tiranë

Aktualitet

lokalGjykata e Tiranës ka përfunduar gjykimin e një hajduteje seriale, pre e së cilës janë bërë plot shtatë lokale të ndryshme në Tiranë.

Sipas Gjykatës, e pandehura Emanuela Malaj “peshkonte” lokalet që kërkonin të punësonin kameriere femra. Vajza bionde, rreth 165 cm e gjatë, prezantohej si “Ela nga Fieri” me eksperiencë pune si kameriere.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

Ajo merrte detyrën dhe pak para mbylljes së turnit gjente një pretekst për të dalë nga dera e lokalit ku nuk kthehej më, duke marrë me vete lekët e xhiros, apo sende me vlerë në lokal. Përmes kësaj skeme, 31­vjeçarja, e kthyer në “makthin” e personave që e punësonin, ka bërë 7 “goditje” gjatë vitit 2015 në Tiranë. Gjatë kohës që ishte nën hetim për 5 vjedhje, në dhjetor 2015 ajo ka kryer edhe dy vjedhje të tjera. Në vendimin e shpallur më 20 korrik në Gjykatën e Tiranës, ajo u deklarua fajtore për akuzën e “vjedhjes më shumë se një herë” dhe u dënua me 1 vit e 4 muaj burg.

Gjatë gjykimin e pandehura ka shfaqur pendesë dhe ka kërkuar dënim të butë me pretendimet se është kryefamiljare, me fëmijë të mitur dhe në gjendje të vështirë socialekonomike. Përveç kallëzimit të pronarëve të lokaleve, gjykata administroi si provë edhe pamjet filmike të kamerave të sigurisë të disa prej tyre, ku janë regjistruara veprimet e të pandehurës.

VJEDHJA 32 MIJË LEKË

Në datën 25.05.2015, shtetasja M.Q., pronarja e një lokali bar­kafe në rrugën “Liman Kaba” në Tiranë ka kallëzuar vjedhjen që i ishte bërë nga një vajzë që kishte punësuar si kameriere. Ajo ka kallëzuar se kishte nxjerrë njoftim për vend punë “kamerier” në lokalin e saj dhe për këtë iu është prezantuar një shtetase, që është prezantuar si Emanuela Malaj, nga Mallakasta, 30 vjeç, e cila ka thënë se kishte eksperiencë të mëparshme pune. Më 25 maj 2015, ajo ka nisur punën dhe pronarja e ka sqaruar se paratë e xhiros kamerieri i dorëzonte në fund të turnit.

Shtetasja M.Q. ka deklaruar se e pandehura Emanuela Malaj ka vazhduar normalisht punën e saj si kameriere deri rreth orës 12:15 të asaj dite. Në këtë orë ajo ka kërkuar leje për të dalë për të blerë diçka për të ngrënë dhe pasi ka dalë nga ky lokal, nuk është kthyer më aty. Kallëzuesja është futur vetë në banal për t’u shërbyer klientëve dhe ka konstatuar që jo vetëm që e pandehura Emanuela Malaj ishte larguar me lekët e xhiros me vete, rreth 12 000 lekë të rinj, por kishte vjedhur dhe 20 000 lekë të rinj, të cilat ishin lënë në banak për të bërë disa furnizime për lokalin. VJEDHJA 11 MIJË LEKË Sipas Gjykatës, në orën 7:00 të datës 16 qershor 2015, e pandehura Emanuela Malaj ka nisur punë si kameriere në lokalin “D…” të shtetasit F.T. Për punësimin e saj është marrë vetë pronari i lokalit, i cili më pas është larguar për në banesën e tij. Rreth orës 13:30, e ka marrë në telefon banakierja e lokalit dhe i ka thënë se kamerierja e re ishte larguar nga puna pa njoftuar askënd, kishte marrë një shumë lekësh dhe kjo gjë kishte rreth 20 minuta që kishte ndodhur. Shtetasi F.T. deklaroi se shuma që shtetasja me emrin Ela i kishte vjedhur ishte rreth 11 000 lekë të rinj dhe këto ishin lekët e xhiros që shtetasja Ela kishte bërë gjatë turnit të saj të punës si kameriere.

VJEDHJA 9 MIJË LEKË

Në po të njëjtën ditë, e pandehura Emanuela Malaj është kallëzuar se ka vjedhur leket e xhiros së një lokali tjetër, duke përdorur po të njëjtin mekanizëm, si edhe në dy ngjarjet e tjera të mëparshme. Konkretisht kjo e pandehur, pasi ka parë një njoftim në gazetë, është paraqitur me datë 13.06.2015, në lokalin “2…” të shtetasit A.A., në rrugën “Komuna e Parisit”. Palët kanë rënë dakord që ajo të fillonte punë si kameriere në këtë lokal ditën e nesërme, datë 14.06.2015. Në këtë datë e pandehura është paraqitur në lokal rreth orës 15:00 dhe ka filluar pune si kameriere. Rreth orës 20:00, banakierja e lokalit ka njoftuar pronarin, duke i thënë se kamerierja ishte larguar dhe me vete kishte marrë dhe lekët e xhiros së lokalit, rreth 9 000 lekë të rinj.

VJEDHJA E ORËS 300 USD

“Goditja” e radhës për të pandehurën Emanuela Malaj është ajo e datës 25.06.2015, në barin “Xh…” të shtetasit O.A. Në lidhje me këtë çështje, shtetasi O.A. ka kallëzuar në Komisariatin e Policisë se ai kishte publikuar një njoftim në gazetë, ku kërkonte një kameriere për lokalin e tij. Sipas këtij njoftimi, në lokalin e tij kishte shkuar një shtetase, që ishte prezantuar me emrin Ela nga Fieri. Ajo ka filluar punë në orën 16:00 të asaj dite, ku ka punuar deri në orën 21:00. Në orën 21:30, shtetasja Emanuela Malaj ka dalë nga lokali, ku kishte filluar punë, duke u larguar pa njoftuar pronarin e lokalit dhe duke marrë me vete lekët e xhiros ditore, si dhe një orë të bashkëshortes së shtetasit O.A., me vlerë 300 dollarë amerikanë.

VJEDHJA 12 MIJË LEKË

Një tjetër ngjarje me të njëjtin mekanizëm, e pandehura Emanuela Malaj e ka konsumuar më 7 korrik 2015, kur ajo ka nisur punë si kameriere në një lokal në Rrugën e Dibrës. Pronari i këtij lokali, Sh.K., ka kallëzuar se njoftimit të tij të publikuar në gazetë për një kameriere i është përgjigjur e pandehura Emanuela Malaj. Pasi kishte filluar punë, rreth orës 14:30 të kësaj date, e pandehura i ka kërkuar leje pronarit Sh.K. të dalë nga lokali dhe të thyejë disa lekë, që t’i kishte për kusur gjatë punës së saj. E pandehura Emanuela Malaj, pasi ka dalë nga lokali, nuk është kthyer më aty, duke marrë me vete të gjithë lekët e xhiros, rreth 12 000 lekë të rinj.

VJEDHJA NË LOTO

Referuar vendimit të Gjykatës, më 18 dhjetor 2015 e pandehura Emanuela Malaj ka nisur punë në një lokal bastesh sportive në rrugën “Bedri Karapici”. Ajo është kallëzuar nga pronari R.U., sipas të cilit, në përfundim të turnit, rreth orës 22:00, kamerierja i ka kërkuar të dilte të blinte një sanduiç dhe do të kthehej për të mbyllur lokalin, por nuk është kthyer më. Kur ka shkuar të bëjë mbylljen, kallëzuesi ka kuptuar se në arkë mungonin paratë e xhiros ditore, të cilat ishin marrë nga e pandehura.

VJEDHJA E PORTOFOLIT

E pandehura është fajësuar edhe për vjedhjen e kryer në një lokal në Kashar, më 27 dhjetor 2015. Emanuela ka pranuar të punojë si kameriere në lokal, duke qëndruar në një kohë prove, por në përfundim të turnit të parë ajo është larguar pa u përshëndetur me pronarët. Rreth orës 20:00 kur kanë mbyllur lokalin, kallëzuesi G.S. është kujtuar të marrë portofolin, të cilin e kishte lënë në sirtarin pranë banakut të lokalit. Kur ka hapur sirtarin nuk e ka gjetur portofolin, në të cilin kishte një sasi parash 200 euro, 10 000 lekë dhe disa dokumente personale. Kallëzuesi ka parë regjistrimet e kamerave të lokalit, ku ka parë momentin e vjedhjes. Ai ka mundur ta kontaktonte të pandehurën, e cila ka pranuar t’i kthejë dokumentet personale të tij, të cilat ia ka lënë në një lokal, para se kallëzuesi të mbërrinte aty. /Panorama/

ME TE LEXUARAT