Veseli: Kosova në mënyrë dashakeqe po paraqitet si vend ekstremist

Kliko per me shume info

kadri-veseli1666Kryetari i Kuvendit të Kosovës, Kadri Veseli , ka thënë se ekstremistët duan ta armiqësojnë botën dhe t’i shkatërrojnë kulturat botërore, këto fjalë i ka thënë në mbylljen konferencës ndërfetare të mbajtur në Prishtinë, “Interfaith Kosova”. Kryeparlamentari, Kadri Veseli, ka thënë që religjioni është vlerë dhe jo instrument i ekstremistëve .

“Ata duan një botë të armiqësuar në mes kulturave dhe vendeve, një botë të kaosit ku të drejtat e njeriut e humbin peshën dhe vlerën e tyre. Është koha që edhe më shumë të bashkohemi rreth vlerave tona liberale dhe demokratike. Është koha që t’ju tregojmë ekstremistëve që religjionet janë vlerë e jona dhe instrument i tyre. Religjioni është tepër i rëndësishëm për ta lënë në dorën e ekstremistëve. Është koha e një fitore të humanizmit liberal“, ka theksuar Veseli.

Kliko per me shume info

Sipas tij, Republika e Kosovës është një vend i vogël, por ka pasur rastin ta trashëgojë një traditë të mirëkuptimit dhe jetesës së përbashkët të religjioneve të ndryshme. Ai, ka përmendur vlerat e shoqërisë kosovare duke marr shkas edhe nga ngjarjet historike që sipas Veselit e pasurojnë kulturën tonë dhe jetesës në tolerancë.

“Është historia e një vendi ku janë takuar perandoritë dhe kulturat e ndryshme. Sot vendi ynë mburret që është pjesë e kësaj historie. Vendi krijoi identitetin multireligjioz që mbart në vete shumë religjione dhe mirëkuptim. Jemi krenarë për këtë traditë dhe kjo traditë është në përputhje me vizionin tonë për të ardhmen, që është vizion evropian dhe euroatlantik. Nuk kemi asnjë vizion përpos kësaj. Qytetarët e Kosovës janë pro perëndimor”, ka thënë Veseli.

Në këtë ekspoze nuk ka mbetur pa u përmendur edhe artikulli i shumë përmendur i New York Times për Kosovën, ku cilësohet si vend i pëlleshëm me ekstremizmin. Këtë raport e Veseli e ka quajtur paragjykues dhe si rezultat i disa njerëzve që me qëllim apo pa qëllim po e portretizojnë Kosovën kështu.

“Kohëve të fundit jemi përballur me një tendencë herë të qëllimshme herë jo për ta paraqitur Kosovën si vend të pëlleshëm për ekstremizmin. Kjo nuk është e vërtetë , është perceptim, paragjykim dhe kjo kurrë nuk i ka kontribuar paqes mes njerëzve. Republika e Kosovës mbetet e përkushtuar në luftën ndaj ekstremizmit të dhunshëm dhe aleatët tanë na kanë përgëzuar për rezultatet në këtë luftë,” ka theksuar kryeparlamentari Kadri Veseli.

Fjalimi i plotë:

Koha t’u tregojmë ekstremistëve se religjionet janë vlerë e jona, e jo instrument i tyre

Dje pasdite, po bisedoja me mikun tim, Rabinin Bemporad, se si brenda çdo tradite religjioze, mësimi themelor është rruga e paqes, mirëkuptimit dhe bashkëjetesës mes njerëzve. Sot, të gjithë ne, kudo që jetojmë, në katër anët e globit, ballfaqohemi me kërcenimin që po i bëhet thelbit humanist të religjionit.

Grupe të ndryshme ekstremiste, në mungesë të ideologjive tjera, përpiqen të instrumentalizojnë shkrimet e shenjta për të përligjur dhunën kundër të tjerëve, si dhe interesat e vrazhda ekonomike dhe politike.

Ashtu si qëllimet e tyre, edhe vizioni i tyre është i errët.

Ata duan një botë të armiqësive mes kulturave dhe religjioneve.

Një botë të kaosit, ku dinjiteti, liritë dhe të drejtat e njeriut të humbin peshën dhe vlerën e tyre.

E tërë kjo ka dimensionin e një sfide globale për njerëzimin.

Është koha që edhe më shumë të bashkohemi rreth vlerave liberale dhe demokratike.

Është koha, që brenda traditave tona të ndryshme kulturore e fetare, të rizbulojmë burimet e mirëkuptimit dhe solidaritetit me njeri tjetrin.

Është koha t’u tregojmë ekstremistëve se religjionet janë vlerë e jona, e jo instrument i tyre. Religjoni është tepër i rëndësishëm për ta lënë në duart e tyre. Është koha për një fitore të re të humanizmit liberal mbi fanatizmin e dhunshëm.

Vetë kjo konferencë, me një pjesëmarrje kaq globale, me emra të nderuar të dijes e humanizmit, është në funksion të këtij qëllimi të përbashkët.

Republika e Kosovës është një vend i vogël, por ka pasur fatin historik të trashëgojë një traditë të madhe e të fuqishme, të rrënjosur thellë në shpirtin e njerëzve të saj, – traditën e mirëkuptimit dhe bashkëjetesës mes feve të ndryshme.

Historia jonë është historia e një territori, ku përgjatë shekujve, janë ndeshur perandoritë e ndryshme, të lindjes e perëndimit.

Është historia e një territori ku janë takuar kulturat dhe religjionet e ndryshme dhe kështu i kanë dhënë jetë pasurisë kulturore që ka sot rajoni ynë.

Sot, vendi ynë mburret me faktin se është pjesë e kësaj pasurie e trashëgimie.

Sot, në kushtet e globalizimit, flitet shumë për qytetarin mulitkulturor, pra qytetarin që në identitin e tij bartë disa përkatësi kulturore. Shekuj me herët, kur në vendet tona ballkanike, po takohej Krishterimi me Islamin, populli ynë krijoj individin multireligjioz, pra individin që bartë në identitetin e tij më shumë se një përkatësi religjioze.

Është pikërisht ky individ, me të cilin zë fill tradita jonë e mirëkuptimit dhe bashkëjetesës religjioze, dhe pamja e bukur tradicionale e qyteteve tona ku kishat, xhamitë dhe sinagogat i kanë bërë hije njëra tjetrës.

Ne jemi krenarë me këtë traditë dhe e ndjejmë veten të lumtur se shpirti i kësaj tradite është në përputhje me vizionin që kemi sot për vendin tonë, – vizionin e integrimit në Bashkimin Evropian.

Ne jemi plotësisht të përkushtuar në përmbushjen e këtij vizioni dhe ndihemi të lumtur se nuk kemi asnjë vizion tjetër alternativ për të ardhmen tonë.

Nuk kemi, dhe nuk mund të kemi, sepse Kosova fizikisht dhe shpirtërisht është vend evropian.

Kohëve të fundit, ne ballfaqohemi me një tendencë, herë të qëllimshme e herë jo, për ta paraqitur vendin tonë si një tokë pjellore për radikalizmin fetar.

Duke njohur shpirtin e njerëzve të këtij vendi, e them me bindje të plotë, se ky është një perceptim i pavërtetë, sipërfaqësor dhe gjithsesi i përkohshëm.

Nuk është e drejtë, as e moralshme, që të gjykojmë për një vend, për kulturën dhe institucionet e tij, duke marrë për bazë veprimet e një grupi të vogël individësh.

Ky është paragjykim, dhe paragjykimet asnjëherë nuk i kanë ndihmuar paqes dhe mirëkuptimit mes njerëzve.

Përkundrazi, ato janë instrumente në duart e fanatikëve dhe ekstremistëve të dhunshëm.

Republika e Kosovës mbetet e përkushtuar, me tërë qenien e saj, në luftën kundër ekstremizmit të dhunshëm.

Ne kemi pasur rezultate të prekshme në këtë drejtim dhe aleatët tanë na janë falenderuar për këto rezultate.

Ne jemi të sigurtë ne fitoren kundër tendencave të ekstremizmit të dhunshëm, jo vetëm për shkak të masave efektive institucionale, por më shumë për shkak të shpirtit sekular të qytetarëve tanë.

Kliko per me shume info
SHARE

LEAVE A REPLY

Please enter your comment!
Please enter your name here