PD: Koncesionet, 660 mln euro kosto buxhetit

Politikë

Jorida-Tabaku5-300x200Partia Demokratike thotë se nuk është kundër koncesioneve dhe partneritetit me privatin, por deklaron se në 3 vitet e qeverisjes së socialistëve, dëmi i shkaktuar buxhetit të shtetit shkon në 660 milionë euro.

“Gjërat që nuk po tenderohen dot qeveria është duke i dhënë me koncesion, ose partneritet publik privat dhe lajmi është që në 900 ditë kemi një kosto 660 mln euro për buxhetin e shtetit, kjo bazuar në të dhënat që ka publikuar vetë qeveria”, deklaroi deputetja e Partisë Demokratike, Jorida Tabaku.

Në një dalje përballë mediave për koncesionet, Tabaku tha se kampione në këtë kosto për buxhetin e vendit është Ministria e Shëndetësisë.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

“Kampione është shëndetësia; kemi 3 partneritete publike-private që kanë përfunduar dhe një sërë të tjerash në proces. Marrim të parin check-up me 120 mln euro. 338 mln euro kosto vetëm shëndetësia, para që mund t’i kishin shkuar buxhetit të shtetit”, u shpreh Tabaku.

Deputetja e opozitës tha se këtë lloj marrëdhënie me privatin e ka nisur Ministria e Financave me bashkëpunimin me Croën Agents.

“U paguan 8.2 mln euro për të humbur 400 mln euro në këto 2 vite e gjysmë. Presupozohej që do të sillte shtesë mbi 100 mln euro”, tha ajo.

Lidhur me koncesionin e TVSH-së, Partia Demokratike pret nisjen e zbatimit të tij për të ndërmarrë më pas hapa ligjorë dhe këtu nuk përjashtohet as ngritja e padisë në Prokurori për hetimin e këtij koncesioni.

“Koncesioni i TVSH do të lancohet në fund të shkurtit dhe Partia Demokratike do të vazhdojë hapat e tjerë në momentin që ky proces nis. Për momentin ky proces është në kuadër të propagandës mediatike. Në momentin që do të zbatohet, atëherë pd do të vazhdojmë me hapat ligjorë”, tha Tabaku.

Tabaku thotë se ka ndryshim mes koncesioneve të dhëna nga qeverisja e demokratëve me ato që po jepen aktualisht dhe u zotua se me të ardhur në pushtet, Partia Demokratike do të anulojë të gjitha kontratat koncesionare që në vlerësimin e saj janë korruptive dhe në shkelje të ligjit.

“Ligji i koncesioneve është shumë i mirë dhe në 2015 u bënë disa përmirësime të tjera, por ne flasim për problematika që kanë të bëjnë me zbatimin e ligjit, jo për problematika të ligjit”, u shpreh Tabaku.

Si shembull tipik Tabaku solli atë të TVSH-së.

“Administrimi fiskal nuk është në fushën e koncesioneve ose në fushën e partneritetit publik privat dhe kjo e bën këtë një koncesion joligjor. Për ne është joligjor dhe korruptiv”, u shpreh deputetja e PD.

Në fund, Tabaku u ndal edhe tek vlerësimi i “Standard & Poor’s”, të cilin demokratët e lexojnë ndryshe nga Qeveria.

“S&P parashikon vlerësimin B+ në periudhën afatgjatë dhe thotë që në periudhën afatshkurtër vlerësimi është B, që fatkeqësisht vërteton atë që kemi denoncuar ne që të ardhurat kanë rënë”, deklaroi Tabaku.

ME TE LEXUARAT