Perez: Ja shkaku i largimit të Casillas nga Real Madridi
Presidenti i Real Madridit, Florentino Perez është filmuar duke u shprehur se Iker Casillas bëri gjithçka për t’i rezistuar kritikave.
Por në fund sipas tij iku nga klubi pasi nuk mund t’i duronte dot më. Portieri ikonë e madrilenëve i dha fund qëndrimit të tij 25-vjeccar në “Bernabeu” javën e kaluar, duke u transferuar tek Porto.
Merr lajme ekskluzive në Whatsapp
Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.
Pesë herë fitues i La Ligas, si edhe i tre titujve në Champions League, Casillas është përballur me akuza të forta që kur humbi për herë të parë vendin e titullarit kur Reali drejtohet nga Jose Mourinho në vitin 2012. “Ai donte të largohej, pasi nuk mundej dot më,” citohet të ketë thënë Perez.
Presidenti arriti të organizonte në minutat e fundit një ceremoni lamtumire për portierin ditën e hënë. Ceremonia u zhvillua vetëm 24 orë pas kritikave të ashpra që kanë ardhur nga një pjesë e tifozerisë madrilene, pasi klubi e la Casillasin të vetëm për të lexuar një deklaratë për largimin e tij.
Perez dhe Real Madrid në qëndrimet e shprehura kanë deklaruar se vendimi për t’u larguar ishte një zgjedhje personale e Casillasit, por Santos Marquez, një nga njerëzit në qëndër të marrëveshjes që e transferoi atë në Portugali, thotë se fituesi i Kupës së Botës u detyrua me forcë të largohej nga klubi.
“Casillas nuk vendosi asnjëherë të braktiste anijen dhe të largohej nga Reali. Ai është shtyrë,” i tha Marquez gazetës “Marca”. “Gjashtë vjet më parë, kur aty ishin Guti dhe Raul, ai ishte i dënuar. Ai ishte kapiteni dhe ishte i dënuar. Në asnjë moment nuk dëgjova Rafa Benitez të thoshte: ‘E dua apo nuk e dua Casillasin.”
Largimi i portierit ka trazuar situatën te Real Madridi dhe ka detyruar drejtuesit e tij të mos bëjnë lëvizje të tjera për momentin në merkato. Ndryshe nga vitet e tjera madrilenët deri tani kanë qënë shumë të heshtur dhe më shumë janë përpjekur të frenojnë një largim të mundshëm të mbrojtësit Sergio Ramos, sesa të kërkojnë lojtarë të rinj.