Edita Tahiri: Në Bruksel ka përparim për telekomunikacionin

Kosovë&Rajon

edita-tahiriNë Bruksel është mbajtur takimi i grupeve punuese për zbatimin e marrëveshjes për telekomin në mes të delegacionit të Republikës së Kosovës dhe Serbisë me ndërmjetësimin e Bashkimit Evropian.

Takimi ka zgjatur 17 orë bisedimesh.

Merr lajme ekskluzive në Whatsapp

Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.

Delegacioni i Kosovës i kryesuar nga ministrja për Dialogun në Qeverinë e Kosovës, Edita Tahiri e cila deklaroi se në këtë raund të bisedimeve në mes të Kosovës dhe Serbisë me ndërmjetësimin e BE-së është biseduar për përafrimin e qëndrimeve në mes palëve në çështjet që janë të lidhura me finalizimin e planit për veprim. Në këtë kuadër, Kosova do ta merr kodin telefonik ndërkombëtar 383 drejtpërdrejt nga ITU dhe se u konfirmua edhe njëherë se kërkesa në emër të Republikës së Kosovës do të bëhet nga ana e Austrisë. Poashtu plani për veprim parasheh që edhe çështja e bashkëpunimit në shërbimet postare në mes të të dyja shteteve të diskutohet dhe të përmbyllet deri në muajin dhjetor të këtij viti.

“Caktimi dhe marrja e kodit telefonik për Kosovën ka rëndësi të madhe sepse Kosova do ketë një kod unik dhe të vetëm siç e ka çdo shtet, për dallim nga situata e tashme kur në përdorim janë disa kode”, ka theksuar ministrja Tahiri, duke shtuar se ka pajtim që edhe operatorët e dy shteteve të bashkëpunojnë në fushën e interkoneksionit dhe roamingut me qëllim dhe synim të zbritjes së tarifave për qytetarët e dyja vendeve dhe marrëveshja parasheh që edhe Kosova të përfshihet në nismat rajonale për marrëveshjen e roamingut.

Më tutje ministrja Tahiri, theksoi se pjesë e marrëveshjes është edhe lejimi i përkohshëm për një kompani të re të telefonisë në Kosovë, e cila do ketë fushëveprim të kufizuar. Ashtu siç edhe është sqaruar nuk bëhet fjalë për operator të ri të telefonisë meqë një lejim i tillë merret vetëm përmes procedurave të garës publike të tenderit me karakter ndërkombëtar. Me dakordimin final të këtij plani për zbatim që pritet të përmbyllet në takimin e radhës të Kryeministrave do të shuhen operimet e operatorëve ilegal që kanë vepruar në Kosovë në fushën e telekomunikacionit brenda një periudhe të paraparë me plan duke vendosur përfundimisht rregullsi në tërë territorin e Kosovës.

Në fund të këtij takimi, palët u dakorduan që bisedimet të vazhdojnë dhe se të hënën e ardhshme me 22 qershor 2015 në Bruksel delegacionet do të takohen prapë.

Delegacioni i Republikës së Kosovës kryesohej nga ministrja Edita Tahiri dhe në përbërje ishin: Valon Murtezaj, këshilltar politik i kryeministrit Mustafa, Gazmir Raci, koordinator politik për telekomin, Elona Cecelia, këshilltare e ministres Tahiri, Ekrem Hoxha, koordinator i grupit të ekspertëve dhe kryetar i Bordit i ARKEP-it, Ilir Imeri, shef i Departamentit të Komunikimeve Elektronike në ARKEP, Ardrit Gashi, këshilltar politik i ministrit Stavileci, Rexhe Gjonbalaj, kryetar i Bordit i PTK, Mehdi Latifaj, drejtor teknik në PTK si dhe ambasadorja e Kosovës në Belgjikë, Mimoza Ahmetaj.

ME TE LEXUARAT